Suno, tumse kuch kehna hai.
Bolo, kya tum sunogi zara…?
Apni saari zindagi,
Mere saath aadhi baantogi na…?
Main jab ghar thak kar lautun,
Tum paani ka ek glass liye muskurana.
Aur jab tum thak kar lautogi,
Main tumhara sir dabakar,
Tumhari saari uljhan bhula doonga.
Jo dhoop ke chhale lagenge tumhare paon par,
Main apni muskaan se har ghaav sah loonga.
Zindagi jab thokar degi,
Kya tab bhi mera haath tum thame rakhogi…?
Shikwe-gile honge hum dono ke beech,
Phir bhi kya tum mera saath nibhaogi…?
Kaamon ko milkar baant lenge.
Bartan main dho doonga, khana tum bana dena.
Chai ke deewane hain hum dono,
Zindagi mein meetha sa pyaar bhar dena.
Emotion, Silence, and Unsaid Understanding
Jo dukh ke kaante chubhenge kabhi,
Tum apni halki si phuunk se marham laga dena.
Log aankhon mein doob jaate hain,
Par tum sirf kinaare par ruke rehna.
Jab meri aankhon mein nami chhup jaye,
Toh tum un aansuon ko apni palkon mein saja lena.
Waada nahi karta main hamesha paas rehne ka.
Par tum chaand bani rehna,
Main sitaara sa kahin aas paas rahunga.
Main kabhi na dikhoon toh gila na karna.
Bas meri khamoshi mein apni chaahat mehsoos kar lena.
Zindagi kabhi khatti hogi, kabhi teekhi lagegi.
Tum muskaan ki mithaas bhar dena.
Jo purane zakham ubharenge kabhi,
Tum ek dard ki dawa ban jana.
Unbreakable Bond and Fragile Love
Jab raaste seedhe ho jaayein,
Toh chaahe toh manzil badal lena.
Aur agar mujh par bharosa na rahe,
Toh dil ke dhaage khud tod dena.
Kabhi yunhi chalte chalte ek lamba safar karenge,
Haath mein haath daal kar,
Har baat khamoshi se keh denge.
Aankhon mein shararat hogi,
Dil mein kuch adhoori fariyaadein bhi.
Kuch adhure tumhare khwab honge,
Aur kuch bikhre panne mere bhi.
Kadi dhoop ko milkar jhel lenge.
Zindagi jaise tum chaho waise jee lenge.
Sardiyon ki raaton mein butte kha lenge,
Aur aankhon se chhoti-chhoti baatein kar lenge.
Tumhare har lafz ko panno par bikher doonga,
Aur har khamoshi ko pyaar se padhta rahunga.
Chaand se thodi dooriyan rakh lenge.
Tum kaho toh aankhon ko bhi band kar lenge.
Sitaaron ki tarah tumhari raahon ko roshan kar denge.
Aur tum chaho toh ek jugnu ban kar bhi chamak uthenge.
Bas, ek rishta dil se nibhaana.
Aur bharosa kabhi tootne mat dena.
Yeh dil thoda kamzor hai, mehbooba.
Ek baar toota toh phir darwaza nahi kholta.
Mujhe sambhal kar rakhna zara.
Agar kabhi kho gaye toh phir mil nahi paayenge.
Tumse hi toh meri pehchaan hai, dilruba.
Tum na ho toh har lafz bejaan lage.
Zindagi ke do pahiye ban kar jeena.
Na zarurat se kam, na mohabbat se zyada chahna.
Suno… tumse kuch kehna tha.
Written by Aamina Khan
“Suno Tumse Kuch Kehna Hai is not just a poem it’s a soft confession, a shared dream, a quiet promise whispered into the soul of someone who means everything. Each line is a hope, each pause a heartbeat. I wrote this for every person who wishes to hold someone’s hand through life, not perfectly but honestly.”
— Aamina Khan
Discover More Heartfelt Poems
- My Rainy Days – Hindi Poem on Nostalgia and Love
- A Death Before Death – A Personal Story of Loss
- Explore Our Full Poetry Collection
We’d Love to Hear From You
Which line from this poem stayed with you?
Tell us in the comments or tag us on Instagram @heartsaysalot with #SunoTumseKuchKehnaHai; we might feature your thoughts in our next post!
